သခင်ယေရှုဘုရားဟာသူရဲ့အမှုတော်မြတ်ကိုအဆုံးသတ်ရန်နောက်ဆုံးယေရုရှင်လင်မြို့သို့ကြွချီ
ခဲ့ပါတယ်။ ထိုနောက်ကျမ်းစာလာသည့်အတိုင်း အသေခံတော်မူခြင်း ကိုပြင်ဆင်ခဲ့ပါတယ်။ ကိုယ်တော်ဟာမိမိရဲ့ခန္ဓာနဲ့ အသက်ကိုရန်သူလက်သို့အပ်နှံပြီး လူသားတွေရဲ့အပြစ်ဒုစရိုက်အတွက် အသေခံတော်မူခြင်း ကိုခံယူခဲ့ပါတယ်။ ကားတိုင်လမ်းကိုလျှောက်စဉ် ကိုယ်တော်ဟာ ပင်ပန်းဆင်းရဲခြင်းဝေဒနာကို အဆုံးစွန်ခံယူခဲ့ပြီး လက်ဝါးကပ်တိုင်ပေါ်တွင် အသက်တော်မြတ် ကိုစွန့်တော်မူခဲ့ပါတယ်။ ဒါဟာလူသားတွေအပေါ် ဘုရားသခင်၏ ချစ်ခြင်းမေတ္တာကိုပြသခဲ့တာဖြစ်ပါတယ်။
သခင်ယေရှုဟာ ကားတိုင်လမ်းကိုလျှောက်စဉ်နှုတ်တော် အားဖြင့် စကားတော် ( ၇ ) ခွန်း မိန့်တော် မူခဲ့ပါတယ်။ ဒီစကားတော်များ ဟာ ကနေ့လူသားတွေကို ပေးတဲ့ ကိုယ်တော်ရဲ့ သတင်းစကားတွေဖြစ်ပါတယ်။ ကိုယ်တော်ဖွင့်ပြတော်မူတဲ့ စကားတော် အားဖြင့် ဘုရားသခင်ရဲ့ အလိုတော်နဲ့အကြံအစည်တော် ကိုကျွန်တော်တို့ကြည့်ကြရအောင်။
၁။ ရှင်လုကာ (၂၃း၂၄)
“ယေရှုကလည်း အိုအဘ၊သူတို့၏အပြစ်ကို လွှတ်တော်မူပါ။ သူတို့သည်ကိုယ်ပြုသောအမှုကိုမသိကြဟု မြွက်ဆိုတော်မူ၏” ဟုမိန့်တော်မူခဲ့ပါတယ်။ ကိုယ်တော်ကိုကရာနိအရပ်တွင်လက်ဝါးကပ်တိုင်ပေါ် ၌ရိုက်ထားကြပြီးတဲ့အခါ ကိုယ်တော်ရဲ့ဝတ်ရုံကို စာရေးတံချကာ ခွဲဝေနေကြပါတယ်။ ကိုယ်တော်ကိုသူတို့ကိုကြည့်ပြီး မိန့်တော်မူခဲ့တာဖြစ်တယ်။
လောကမှအဆုံးဝါးဆုံအရာကမသိခြင်းပါပဲ။ မသိတဲ့အတွက်မမှားသင့်တဲ့အမှားတွေ ကျူးလွန်ကြတာ မလုပ်သင့်တဲ့အလုပ်ကိုလုပ်မိတာ အများကြီးပါပဲ။ အခုလည်း လူတို့ဟာ မသိခြင်းကြောင့် လူသားတွေကိုချစ်သောဘုရားရဲ့သားတော်ကိုပြစ်မှားပြီး လက်ဝါးကပ်တိုင်ပေါ်တွင် အသေသတ်ကြ တာဖြစ်တယ်။ အသေသတ်ရုံမက သေးဘူး ပြက်ရယ်ပြုခြင်း၊ မထီမဲ့မြင်ပြု ခြင်းအမှုကိုပင် သူတို့ကျူးလွန်ကြတာဖြစ်ပါတယ်။
ဒါပေမဲ့ဒီအရာအားလုံးကိုဘုရားကခွင့်လွှတ်တယ်ဆိုတာတွေ့ရပါတယ်။ (၁ ယော ၁း၉)မှာ “ကိုယ်အပြစ်ကိုဖော်ပြတောင်းပန်လျှင် ငါတို့အပြစ်များကိုလွှတ်၍ ဒုစရိုက်အပြစ်ရှိသမျှနှင့် ကင်း စင်စေခြင်းငှာ ဘုရားသခင်သည်သစ္စာတရားနှင့်၎င်း၊ ဖြောင့်မတ်ခြင်းတရားနှင့်၎င်း ပြည့်စုံတော်မူ၏” ဟု ဖော်ပြထားပါတယ်။ ကျွန်တော်တို့မသိခြင်းကြောင့် ကျူးလွန်သည့်အပြစ်များကို ကိုယ်တော် ခွင့်လွှတ် တော်မူကြောင်းကို သိရပါတယ်။ သို့သော်ကျွန်ုပ်တို့ဟာ ဒီအပြစ်မှနောင်တရပြီး ကိုယ်တော်ကို မျှော်ကြည့်တဲ့အခါ ဒီအပြစ်ထဲက ကိုယ်တော်ကယ်တင် မှာဖြစ်ကြောင်း နားလည်နိုင်ပါတယ်။
၂။ “ယေရှုကလည်းငါအမှန်ဆိုသည်ကား၊ ယနေ့တွင်သင်သည်ငါနှင့်အတူ ပရဒိသုဘုံတွင် ရှိလိမ့်မည်“ (ရှင်လုကာ ၂၃း၄၃) ဟုလက်ဝါးကပ်တိုင်ပေါ် တွင်သူနဲ့အတူရိုက် ထားခြင်းခံရသော သူခိုးဓမြတစ်ဦးကိုကတိတော်ပေးခဲ့ပါတယ်။ သခင်ယေရှုလက်ဝါးကပ်တိုင်ပေါ်တွင် ရိုက်ထားခြင်း ခံရတဲ့နေရာမှာ သူနဲ့အတူတစ်သက်လုံး ခိုးဆိုးလုယက် မိုက်တွင်းနက်ခဲ့တဲ့ ဓမြနှစ်ဦးကိုလည်း အတူ အသေသတ်ခြင်းခံကြရပါတယ်။ ဒါပေမဲ့ဒီဓမြနှစ်ဦးက သူ့မိုက်ပြစ်နဲ့သူခံရကြသူများဖြစ်ပါတယ်။ တစ်ယောက်ကသူ့မိုက်ပြစ် ကိုနောင်တရဲ့ပေမဲ့ တစ်ဦးကတော့ လုံးဝနောင်တ မရပါဘူး။ နောက်ဆုံးအချိန်မှာပင် နောင်တရတဲ့အခါသူ့အတွက် ကယ်တင်ခြင်းကျေးဇူးဟာ ရှိတဲ့အကြောင်း ကတိတော်အားဖြင့်ဖော်ပြခဲ့တာဖြစ်ပါတယ်။
ပရဒိသုဘုံဆိုတာ ဂရိဘာသာစကားအားဖြင့် ”ဥယျာဉ်တော်” ဟု အဓိပ္ပါယ်ရှိပါတယ်။ တနည်း အားဖြင့် ဘုရားသခင်ပြင်ဆင်တော်မူတဲ့လူသားများ အတွက်နေရာတစ်ခုဖြစ်ပါတယ်။ ဒီနေရာ မှာ နောင်တနဲ့ကိုယ်တော်ကိုမျှော်ကြည့်ကြတဲ့သူတွေ အတွက်နေရာရှိကြောင်းတွေ့မြင်နိုင်ပါတယ်။
၃။ ကိုယ်တော်ဟာ လက်ဝါးကပ်တိုင်ပေါ်မှာ ရိုက်ထားခြင်းခံရချိန် မယ်တော်မာရိနဲ့ သူ့ရဲ့နောက်တော် ကိုလိုက်ကြတဲ့ အမျိုးသမီးအချို့ လာကြည့်ကြပါတယ်။ သူတို့နဲ့အတူ ကိုယ်တော်ရဲ့ တပည့်တော်ယောဟန်လည်းပါဝင်ပါတယ်။ သခင်ယေရှုဟာလက်ဝါးကပ်တိုင်ပေါ်မှ မယ်တော်မာရိအား သင့်ရဲ့သားကိုကြည့်ရှုလော့ဟု မှာထားတော်မူခဲ့လို ယောဟန်ကိုလည်းသင့်ရဲ့ အမိ ကိုကြည့်ရှုလော့ ဟုမှာထားတော်မူခဲ့ပါတယ်။
ဒီနေရာမှ ကျွန်တော်တို့ ဘာကိုတွေ့ရသလဲ ဆိုတော့လူသားရဲ့ ချစ်ခြင်းမေတ္တာ သဘောကိုတွေ့ရ မှာဖြစ်ပါတယ်။ သခင်ယေရှုအနေဖြင့် မကြာခင် သူချစ်တဲ့သူတွေနဲ့ ခွဲခွါရတော့မှာဖြစ်ပါတယ်။ အဲဒီအချိန်မှာ အချင်းချင်းဖေးမလျက်၊ ချစ်ခင်လျက် တစ်ယောက်ကို တစ်ယောက်ကြည့်ရှုကြဖို့ မှာထားတော်မူခဲ့ပါတယ်။
(ရှင်လုကာ ၂း၃၅) ကိုကြည့်ရင်ယေရုရှလင်မြို့မှာ ရှုမောင်ဆိုတဲ့သူတစ်ယောက်ရှိပါတယ်။ သူဟာဖြောင့်မတ်တဲ့ သူဖြစ်သောကြောင့် ခရစ်တော်ကို မမြင်ရရင်မသေရဟု ဗျာဒိတ်တော် ရှိထားသူဖြစ်ပါတယ်။ သူဟာသခင်ယေရှုကိုမြင်တဲ့အခါ ဘုရားသခင်ရဲ့ ပြင်ဆင်တော်မူခြင်းကိုကျေးဇူးတော် ချီးမွမ်းလျက် ဤသူဟာဣသရေလ လူတွေကိုလဲစေမည့်သူဖြစ်သလို၊ ထမြောက်စေမည့် သူဖြစ်ကြောင်း ဗျာဒိတ်ပေးခဲ့ပါတယ်။ မယ်တော်မာရိကို လည်း သူဟာသံလျက်ကဲ့သို့ သင့်ရဲ့ နှလုံးကိုခွင်းလိမ့်မည်ဟု ကြားပြောခဲ့ပါတယ်။ ထိုဗျာဒိတ်တော်ပြည့်စုံချက်ကို ကျွန်တော်တို့ ဤနေရာမှတွေ့မြင်ရမှာဖြစ်ပါတယ်။
၎။ နေမွန်းတည့်သုံးချက်တီးကျော်တဲ့အခါသခင်ယေရှုဟာတိုင်တော်ပေါ်မှာ “ဧလိ၊ဧလိ လာမရှာဗခသာနိ” ဟူ၍ကြီးစွာသော အသံနဲ့ကြွေးကြော်ခဲ့ပါတယ်။ အဓိပ္ပါယ်က အကျွန်ုပ် ဘုရား၊ အကျွနိုပ်ဘုရား အဘယ်ကြောင့် အကျွန်ုပ်ကို စွန့်ပစ်တော်မူသနည်း ဟူ၍ဖြစ်ပါတယ်။
(ဆာလံ ၂၂း၁-၂) မှာဒါဝိဒ်က “အကျွန်ုပ်ဘုရား၊ အကျွန်ုပ်ဘုရား အဘယ်ကြောင့်အကျွန်ုပ် ကိုစွန့်ပစ်တော်မူသနည်း။အကျွန်ုပ်ကိုမကယ်တင်ဘဲ အကျွန်ုပ်အော်ဟစ်သောစကားကို နားမထောင်ဘဲ အဘယ်ကြောင့် အဝေးမှနေတော်မူသနည်း။ အကျွန်ုပ်ဘုရား၊ နေ့အခါအကျွန်ုပ်အော်ဟစ်သော်လည်း ကိုယ်တော် နားမထောင်ပါ။ ညဉ်အခါ အော်ဟစ်သော်လည်း သက်သာခြင်းသို့မရောက်ပါ။” ဟုဖော်ပြချက်ပါရှိပါတယ်။ အခန်းငယ်(၁၈)မှာ အကျွန်ုပ်အ၀တ်ကိုအချင်းချင်း ဝေဖန်၍အကျွနုပ်အကျီ ကိုစာရေးတံချကြပါ၏” ဟုဖော်ပြချက်ပါရှိပါတယ်။
ကိုယ်တော်ဟာ ဗျာဒိတ်တော်ပြည့်စုံချက်ကို ထင်ရှားပြသခဲ့ပါတယ်။ ဒီနေရာမှာကိုယ်တော် ရဲ့အော်ဟစ်သံကို ဘုရားသခင်ကနားထောင်တော်မူခြင်း မပြုသလို အဆုံးတိုင်အောင် ကိုယ်တော် ကလည်းဝေဒနာခံတော်မူခြင်းကို ပြုခဲ့ရတာဖြစ်ပါတယ်။ ကျွန်တော်တို့အသက်တာမှာလည်း ကျွန်တော်တို့ ဆုတောင်းခြင်းအတွက် အဖြေမရှိတဲ့အခါ အလိုတော်ကိုလိုက်လျှောက်ဖို့ သခင်ယေရှုအားဖြင့် စံနမူနာယူဖို့လိုပါတယ်။
၅။ ထပ်မံပြီးကိုယ်တော်ဘုရားဟာကျမ်းစကားပြည့်စုံတော်မူချက်အလို့ငှာ ရေငတ်တော်မူ၏ဟု မိန့်ဆိုခဲ့ပါတယ်။ အဲဒီမှာအစောင့်က သူ့ကို ရေမှို တစ်ခွက် ကို ဥဿုံပင်အကိုင်း ကို တပ်ပြီး သောက်စေခဲ့ပါတယ်။ ဆာလံ (၆၉း၂၀-၂၁) မှာ “ကဲ့ရဲ့ခြင်းအားဖြင့်အကျွန်ုပ်သည်စိတ်ပျက်၍ အလွန် ပူဆွေးခြင်းရှိပါ၏။...................................ရေငတ်သည့်အခါပုန်းရည်ကိုတိုက်ကြ၏” ဟုဖော်ပြ ချက် ပါရှိပါတယ်။ သခင်ယေရှုဟာဝေဒနာခံတော်မူလျက် နောက်ဆုံးတွင်ရေတစ်ခွက်ကိုတောင်းလျက် ဗျာဒိတ်တော်ပြည့်စုံချက်ကိုဖော်ပြခဲ့တာဖြစ်ပါတယ်။
ကျမ်းစာမှာ ကျွန်ုပ်တို့၏ ဆာလောင်မွတ်သိမ့်မှုကို ဘုရားသခင် ကဖြေဖျောက်ေ ပးကြောင်း တွေ့မြင်ရမှာဖြစ်ပါတယ်။ သခင်ယေရှုဟာ ယုဒပြည်ကနေ ဂါလိလဲကိုသွားတဲ့အခါ ရှုခါမြို့ကိုရောက်ရှိခဲ့ပါတယ်။ ရေတွင်းနားမှာရှမာရိအမျိုးသမီးစီကရေကိုတောင်းသောက်ပါတယ်။ ဒါနဲ့ရှာမာ ရိ အမျိုးသမီးက သင်သည်ယုဒလူဖြစ်လျက်နဲ့ဘာလို့ကျွန်မဆီမှာရေတောင်းသောက်သလဲ လို့မေးခဲ့ပါတယ်။ အဲဒီမှာသခင်ယေရှုက “ငါပေးသောရေကိုသောက်သောသူမူကား၊ ရေငတ်ခြင်းနှင့်အစဉ် မပြတ်ကင်း လွတ်လိမ့်မည်။ ငါပေးသောရေသည် ထိုသူ၌ထာဝရအသက်ရှင်ခြင်းအလို့ငှာ ထွက်သောစမ်းရေဖြစ် လိမ့်မည်” (ယောဟန် ၄း၁၄) မှာမိန့်တော်မူခဲ့ပါတယ်။
ဘ၀မှာပူလောင်ပြင်းပြတဲ့အခါ အေးမြတဲ့စမ်းရေးအေးလေးတစ်ပေါက်လိုပါတယ်။ ပူပြင်းမှုတွေကို ဒီစမ်းရေးအေးကဖြေဖျောက်ပေးနိုင်သော်လည်း ခဏတာသာဖြစ်ပါတယ်။ သခင်ဘုရားပေးတဲ့ရေဟာ ထာဝရအသက်ရှင်ခြင်းအခွင့်ပေးတဲ့စမ်းရေအေးဖြစ်ကြောင်းကတိတော်ပေးခဲ့ပါတယ်။
၆။ သခင်ယေရှုဟာပုန်းရေခွက်ကိုသောက်ပြီးတဲ့နောက်မှာ “ဤအမှုပြီးပြီ” ဟု မိန့်တော်မူ ခဲ့ပါတယ်။ ဆိုလိုတာကတော့ ဘုရားသခင်ရဲ့ ကယ်တင်တော်မူခြင်းကျေးဇူးဟာ ပြီးစီးခြင်းရှိပြီ ဆိုတဲ့သဘောပါပဲ။ သခင်ယေရှုဟာ လက်ဝါးကပ်တိုင်ပေါ်မှာအပြစ်သားကဲ့သို့ အသေခံတော်မူခြင်းအားဖြင့် ဘုရားသခင်ပြင်ဆင်တော်မူသော ကယ်တင်ခြင်းအမှုကို ပြီးစီးစေခဲ့ပါတယ်။ ကိုယ်တော်ပြုတော် မူသော ကျေးဇူးတော်ကြောင့် ကျွန်တော်တို့ဟာ အပြစ်တရားအားဖြင့် ကမ္ဗာလာလိုနီသော်လည်း မိုးပွင့်ကဲ့သို့ဖြူ စင်သောအသက်တာသစ်ကို ရရှိနိုင်စေမှာဖြစ်ပါတယ်။
၇။ သခင်ယေရှုဟာနောက်ဆုံးမှာကြီးစွာသောအသံတော်အားဖြင့် “အိုအဘ၊ အကျွန်ုပ်စိတ်ဝိညာဉ် ကိုယ်တော်လက်၌ အကျွန်ုပ်အပ်ပါ၏” ဟူ၍ မိန့်တော်မူပြီ အသက်တော်ချုပ်ငြိမ်းခဲ့ပါ တယ်။ နောက်ဆုံးမိမိ ဆောင်ရွက်စရာအမှုနဲ့တကွ အသက်တော်ကို သခင်ဘုရားလက်၌ အပ်နှံပြီး အမှုတော်ကိုပြီးစီးစေခဲ့ပါတယ်။ (ဆာလံ ၃၁း၁) မှာ “အိုထာဝရဘုရား၊ ကိုယ်တော်ကိုအကျွန်ုပ်ခိုလှုံပါ၏။ ရှက်ကြောက်ခြင်းနှင့်အစဉ်ကင်းလွတ်ပါစေသော။ တရားတော်နဲ့အညီ အကျွန်ုပ်ကိုကယ်တင်တော်မူပါ။” ဟုဖော်ပြချက်ပါရှိပါတယ်။ အငယ်(၅)မှာ “သစ္စာစောင့်တော်မူသောဘုရားသခင်၊ ထာဝရဘုရား ကိုယ်တော်သည်အကျွန်ုပ်ကို ရွေးနှုတ်တော်မူသည်ဖြစ်၍ အကျွန်ုပ်ဝိညာဉ်ကို ကိုယ်တော်လက်၌အပ်ပါ၏” ဟုဖော်ပြထားပါတယ်။
သခင်ယေရှုဟာနောက်ဆုံးအမှုတော်မြတ်အတွက်အစေတော်ကို ခံပြီး မိမိရဲ့အသက်ဝိညာဉ်ကို ဘုရားသခင်ထံအပ်နှံကာကိုယ်တော်ပြင်ဆင်ပေးတဲ့ ချီးမြှောက်ခြင်းကိုခံတော်မူခဲ့ပါတယ်။ ဒါကြောင့်ကရာနီ လမ်းကို ကိုယ်တော်လျှောက်စဉ် နှုတ်မြွက်တော်မူခဲ့သော စကားတော်(၇)ခွန်းဟာ ဘုရားသခင် ရဲ့ပြင်ဆင် တော်မူခြင်းကျေးဇူးတော်ကိုကျွန်ုပ်တို့ အားပြသလျက်ရှိပါတယ်။ ဘုရားရှင်ရဲ့ ကတိတော်ပြည့် စုံတော်မူခြင်းအကြောင်းကိုလည်း နားလည်စေခဲ့ပါတယ်။
ဒါကြောင့် လူသားတွေ့ရဲ့ အပြစ်အတွက် အသေခံတော်မူသော သခင်ယေရှုရဲ့ပြုတော် မူသော ကျေးဇူးတော်ကို ကျွန်တော်တို့လက်ခံ ရယူကြတဲ့အခါ ဘုရားသခင်ရဲ့ ကတိတော် နဲ့ ပြည့်စုံတဲ့ကောင်းချီးမင်္ဂလာကို ခံစားရမှာဖြစ်ပါတယ်။
No comments:
Post a Comment